Luke 1

Luk ere gwo tuma basen Tiofilus erne newopitim.

1O apeilake tame Tiofilus, kiyi tame kau eme Jisas eter kerebetemkap eme basem. 2Tame eme Jisas eter nenbetem wos lam, eteri wusoubetem tuma eme metem, eme nemne etep wusowum. Emri lan wusowumkap, kau tame eme etep bas rasem. 3Bas rasem, an kir an ete tuma basen nene newopitte abobe. Emri basem tumakap an etep noub lam, an etepke noub baste. 4Ete tuma eme nene kiyi wusowum, ne metem. Ete tuma an basen nene newopitte, ne lan etep mette, neri kiyi metem tuma e seken.

Jon ere tete tuma God eteri kom tame ere Sekaraia erne wom.

5Kiyi Herot ere Juda tatame etemri apeilake temenem, God eteri akek yaku kerebetem tame wuri ere temenem. Eri sig Sekaraia. Ere Abiya eteri wakse. Eri ta te Aron eteri yen supa. Ta teri sig Elisabet. 6God ere lam, epe tatame yenbo. Keryen God eteri tuma, eteri wule epe meten nenbetem. 7Epe yen berai. Elisabet te yen game abetem ta, epe keryen tem.

8Yabel wuri Sekaraia ere akeite tameken eme God eteri yaku God eteri ake eisauke kerebetem. 9Kerebetem, eri yaku kere tamesip eme erne etep wom. Gwopte ne God erne bos yenbo yabe wos liste. Etep wom, ere ake puri yenbok yin wurim. 10Wurim, ere bosken wos lisbetem, tatame nogwape eme kom genik wurisubuk tetemenem, eme God erken tuma namdebetem. 11Namdebetem, ere lam, God eri komri tame ere bos yenbo yabe wos lisbetem emi pi seit yekwok tetemenem. 12Etep lam, Sekaraia ere wouken akem. 13Wouken akem, God eri kom tame ere erne etep wom. Sekaraia, ne mane akte. God ere neri namdebetem tuma metem, neri ta Elisabet te taureyen warwite, ne eri sig Jon tete. 14Erne warwite, neri pap yenbo mette, ne metekwaste. Tatame nogwape eme etep yan late, eme kir metekwaste. 15Yuri ete yen ere God eteri yaku yenbo kerete. Keryen God ere etep late, ere erne tame yenbo wote. Ete yen ere ok yaper mane ate. Erne nawo te warwite, God Eri Wou ere eterken somsom temente. 16Ere Israel tatame emne God eri tuma wusoute, tatame nogwape eme meten Keryen God eterne kenawaike sene abote. 17God ere erne wote, ere God eteri kiyi temenem tuma wusoubetem tame Elaija eterkap tete. Ere mureken tete. Eike yenken aken eme pekan kenakena tete, ere emne tuma yenbo wote, eme sene noub site. God erne beke abo tatame eme wan gwolebe, ere emne tuma yenbo wusowun, eme porere yenbo pette. Ere tatame nogwape emne etep wote. Kem kemri wule yaper mesginte. Aneyen ere yate nenbe. God eri kom tame ere Sekaraia erne etep wom.

18Sekaraia ere God eri kom tame erne awosein etep wom. Neri woye tuma e seken o? An mapeke met. An ari taken nesa keryen teye. 19God eri kom tame ere awosein etep wom. An Gebriel, an God eteri bitimik tetebe tame. Ere ane won yawo, eke an nene tuma seken woye. 20Ari woye tuma ne kenawaike beke met, eke ne tuma eikse tame tete nenbe, ne tuma beke kip namde. Tuma eikse ten yin aren nene woye tuma ere seken tete, neri ta te yen warwitek, ne kip tuma sene namdete nenbe. Etep wom.

21Sekaraia ere God eteri ake purik wurmenem, tatame nogwape eme erne sene worate koumenem. Koulawoyim, eme etep wom. Sekaraia ere beke wora. Ere kap beke nenyeke, ere God eteri ake purik som tetan? 22Etep womke, ere sene yan woram, ere tuma eikse tem, ere emne tuma letwouke peterabetem. Peterabetem, eme etep wom. Ere wurmenye, ere kap be woske laye, ere tuma eikse teye? 23Etep wom, Sekaraia ere God eteri akek kerebetem yaku omom, ere akek sene yim.

24Yuri eri ta Elisabet te yenken tem. Yenken tem, lup ep yekwo let te etetri akek berasen simenem. 25Te etep wom. Keryen God ere ane yenbo nenemke, an yenken teye. Tatame eme ane sene beke kip wo. An yen game abe ta. An sebera sene beke kip ya.

God eri kom tame ere Maria tene etep wom. Ne Jisas erne warwite.

26Elisabet te yenken tem, lup ep yekwo let ep yekwo let ges wuri (6-pela) yim, God ere eteri kom tame Gebriel erne sene won ere Galili distrikke tetan kom Nasaretke yim. 27Yim, ere munguta wuri tene tuma wusoute yim. Ete ta tene eme tame womenem. Tame eri sig Josep. Ere kiyi temenem Keryen Devit eteri supa. Munguta teri sig Maria. 28Yim, ere tene pir wom, ere etep wom. Keryen God ere nerenken tetan. Ere nene noub nenem. 29Te etep metem, te abolawoyin etep abom. E mapkap tuma? 30God eteri kom tame ere tene etep wom. Maria, ne mane akte. God ere nene noub nenem. 31Yuri ne yenken tete nenbe. Ne taureyenke warwite nenbe. Ne erne sig Jisas tete. 32Yuri ere keryen tete, tatame eme eterne etep wote. Ere Hevenke tetan God Eteri Yen. Etep wote. Kiyi Devit ere keryen temenemkap, yuri Jisas ere eteri yaku pette, ere keryen tete. 33Ere warege Jekop eteri tame supa emne somsom panen site. Ere keryen som temente. Ere etep wom.

34Maria te erne awosein etep wom. An yenken mapeke te? An tame mak narten. 35Ere tene awosein etep wom. Akei wos God eteri kulke tetan. God Eteri Wou ere nerenke yate. God eteri mure ere nene newote. Etepkap ne yenken tete. Yuri ne warwite yen eme erne etep wote. Ete yen ere yenbosubuwai. Ete yen ere God Eteri Yen. Eme etep wote.

36Metye. Neri wopu te Elisabet, kiyi eme tene etep wobetem. Te yen beke se. Te yen game abe ta. Eme etep wobetem, gwopte te keryen tebe, te yenken. Te lup ep yekwo let ep yekwo let ges wuri (6-pela) yim. 37Wos nogwape God ere kuyese nenbe. Etep wom.

38Maria te etep wom. An God eteri yaku kere ta. Neri woyekap ere ane etep nente, an kir teye, e yenbo. Etep womke, God eteri kom tame ere tene mesginin sene yim.

Maria te Elisabet tene late yim.

39Ete yabel Maria te wos peten agetage te kowke yim, te Juda distrikke tetan kom nebule etek yim. 40Yim, te Sekaraia eteri akek wurin Elisabet tene pir wom. 41Pir wom, Elisabet teri sek temenem yen ere titowum. Titowum, God Eteri Wou ere Elisabet tene gulelemenem, 42te Maria tene noubke etep wom. God ere nene noub kobo lam. Ere akeite ta emne etepkap beke nen. Neri sek tetan yen eter kir, God ere erne kir kobo late. 43Ari keryen eri nawo te ane late yawo, an pap yenbo metye. 44Neri woye pir an metye, agetage ari sek tetan yen ere metekwasye. 45God ere nene wom tuma ne etep kenawaike abobe, eke ne metekwaste. Elisabet te tene etep wom.

Maria te sekwo wuri lomem.

46Maria te etep wom.

Ari selpapke an Keryen God eri sig eisau wobe.
47Ari selpapken porereken an Keryen God erne metekwasbe.
Ane sene petem God ere ane eyarem. An erne sig eisau wobe.
48An eteri yaku kerebe ta nebule. Ere ane abobetem, eke an metekwasbe. Mure sapeken God, ere ane wule eisau nenye, eke gwopte tetan tatame, yurik tete nenbe tatame eme wote. God ere ane yenbo nenbe. Eri sig e yenbowai.
50Eteri kulke tetan tatame emne ere kobo labe. Kiyiri tatameken gwotepteri tatameken yurik tete tatameken emne eter som kobo labetete.
51Eteri letke God ere sapeken wos nenbe. Ere sig maime eisau wobe tame emne won sekiyin, eme yikwute yakwutem.
52Ere kom panen siten keryen tame emne teitkwunbetem. Maime sig teitkwunbe tame emne ere emri sig eisau wom.
53Se kwoi sam tatame ere emne a yenbo newon abetem. Eme an se kir tem. Kel worken tatame emne ere wos beke newo, ere emne won, eme bepou me yim.
54Ere eteri yaku kere tame, Israel, erne kobo lam. Ere neremri warege etemken namderasem tuma abopitim. Ere warege Abrahamken eteri nanken emne noub som eyarbe.
56Etep ten, Maria te Elisabet teken lup mur etek ten te komke sene yim.

Elisabet te Jon erne warwiyim.

57Elisabet te yen warwite yabel tem, te taureyenke warwiyim. 58Warwiyim, teri kom tame, teri tame supa eme metem, Keryen God ere tene noub nenem, eke te yen warwiyim. Etep metem, eme metekwasem.

59Yabel ep yekwo let ep yekwo let bor mur (8-pela) tem, tame kau eme yam. Eme yen erne somo kwunen erne sig tete yam. Eme ar eteri sig Sekaraia tete wom. 60Etep wom, nawo te mo won etep wom. Berai. Nema eri sig Jonke tete. 61Etep wom, eme tene wotaken etep wom. Ete sig e neri tame beig etemri sig berai. 62Etep wom, eme ar erne letke peteran erne etep wolam. Yen erne sig mapeke tete? 63Etep wom, ar ere siglou womke, eme siglou peten sen yan erne newom, ere yen eri sig etek basem. Ere etepke basem. Eri sig Jon. Etepke bas rasem, eke eme wouken akem. 64Wouken akem, agetage Sekaraia ere tuma sene namdem, ere God erne tuma yenbo wom. 65Wom, kom tatame eme lam, ere tuma sene namdem, eke eme wouken akem. Judia distrikke tetan kowke temenem tatame nogwape eme ete tuma kir metem. 66Metem, nogwape tatame eme etep wobetem. God eri mure ere ete yen eterken tetan. Ete yen ere aneyen tete, ere kap be yakuke kerete nenbe? Eme etep wobetem.

Sekaraia ere God eri tuma wusowum.

67God Eri Wou ere Jon eteri ar, Sekaraia, eterne gulelen ere yurik tete wos wusowum. 68Ere etep wom. Nema Israel tatame, nema Keryen God erne tuma yenbo wote. Ere eri tatame emne kobo lan emne sene petem. 69Ere eri yaku kere tame Devit eri tame supa wuri kenem. Ete tame ere mureken tame, ere nemne sene pette, nema yenbo tete. 70Kiyi God ere eteri tuma wusoubetem tame yenbo emne tuma wusowum, sene eme tatame emne ete tuma wusowum. Eme etep wom. 71God ere etep wom. An kemne peiktameken kemne pap yaper tebe tameken etemri letke an kemne sene pette. 72Ere sene etep wom. An yeiwarege emne kobo lam, kiyi namde rasem tuma yenbo an beke wan get. An som abobe. 73Ere emri warege Abraham erken tuma namde rasen etep wom. An keremri peiktame emne teitkwunte. Teitkwunte, kem temente, kem ari yaku kerete, kem mane akte. An late, kem yenbo temente. Ere Israel tatame nemne etep wom. 76Sekaraia ere etep womke, ere eri yen erne etep wom. Areri yen, yuri ne keryen erne taresin yin eri kelu noub eyarte. Tatame eme nene etep wote. Ere Hevenke tetan God eteri tuma wusoube tame. Eme nene etep wote. 77Wote, ne tatame emne etep wote. Kerem, kem wule yaper mesginte. Mesginte, God ere kemri nenbetem wule yaper magel taite, ere kemne sene pette. Ne emne etep wote. 78Neremri God ere kobo labe tame, eke ere gwopkap nenbe. Tatame eme kerneirikapke siten, eme sate akbe. God Eri Yen ere Hevenke tetan, ere erne won yate, ere yabelkap paste, eke neir ere eikap berate nenbe. Etep tete, ere nemne kelu yenbo peterate, nema noub site nenbe.

80Etep womke, yuri Jon ere aneyen tem, ere mureken tem. Ere tatameken berai emik yin ten temenem. Ten yin, yuri ere Israel tatame emne God eteri tuma wusowum.